క్షతగాత్రులు

క్షతగాత్రులు

                                                                                                                              

అ దొక అంతులేని  అసహాయ అవేదనల సమూహం,

సహజీవన ఆలంబన కరువై , ఆక్రందనలకు నెలవైన

అనుమానపు బాణాల గాయాల చిరునామాలవి..

ఆ హృదిలో కూడా జాతీయ  సమైక్య సద్భావనా వీచికలే  .

అయినా  , నిర్దాక్షిణ్య , దురహాంకార ఫాసిస్ట్ చేతుల్లో

బలౌతున్న పరాచికాల  పాచికలు  .

మాతృ దేశ భక్తి  భావనల  పేగు తెంచుకుని

అలీగానో, అక్బర్ గానో ,అమీనా గానో ఊపిరి పీల్చుకున్న ప్రాణం

మస్ జిద్ గోడ ప్రక్క గోలీలాడుకుంటూ ,  స్వేద తీరే ప్రాయంలోనే

సైనైడు గుళికలై , బెల్ట్ బాంబు లై  పేలిపోతున్నాయి.

 గుట్టుగా గమ్మున తప్పిపోయి , పవిత్రపోరుకు నైవేద్యాలుగా మారిపోతున్నాయి.  

అమ్మీ అబ్బాల జ్ఞాపకాల్లోనో ,  గోడకు తగిలించిన

నమాజ్ టోపీల్లోనో మిగిలిపోతున్నాయి. -

తప్పితే , చీకట్లోనే బానేట్లుకు  నెత్తురు మరకలై ఎండిపోవడమో -

రెక్కలు తెగిన  పంజరపు చిలకల్లా , జైల్లో మగ్గి పోవడమో -

అప్రమేయంగా, ఓడిపోయి  , పరాధీనమై వాడి పోవడమో -

అలవడ్డ అనివార్య అణిచిన ఆక్రందనల  జీవనం..

 కడుపుకోతకు  పర్యాయంగా అవిసిన గుండెల్లో కన్నీళ్ళై

ఘనీభవించి కానరాని కలల  కల్లోలాలై మిగిలిపోవడమో

అదొక అంతులేని వింత వ్యధ .. ఖుదా !ప్చ్                   

శాపగ్రస్తుల్లా విముక్తి లేని పుట్టుక.

ప్రపంచం లో ఎక్కడ  ఏ మూల ఏమి పేలినా ,ఎవరు రాలినా

అందరి అనుమానపు చూపులు ఆ  బస్తీ  వైపే .

ఆ నామ రూపాలు సాక్షులు ,  మతమే నేర నిర్ధారణా యంత్రం,   

ఖాకీలజులుం కో , కళ్ళాల్లేని కషాయిల కవాతుకో

యవ్వనమే శాపమై, కరిగిపోతున్న నిషిద్ద స్వరాలువి .

హలాల్ అందిస్తూ , హలీమ్ తో మరపిస్తూ,  సాంబ్రాణి  ధూపా లేస్తూ

దర్గాల్లో, కడుపులు పండాలని

సుతిమెత్తని  పీరుల నెమలి ఈకలు విసురులతో  సౌకుమార సూఫీలు  పాడుతూ ,

 జనజీవన భాగాస్వామ్య మమేకమౌ వ్వాల్సినోళ్ళు   ,

పుట్టు మచ్చను  రాచ పుండు గా మార్చింది ,మాయ లోకం .

 దిక్కు చూపుల బిక్కు దైనందినం లో

రేపటి బ్రతుకు కోసం పోరు ,

 నిన్నటి ఆనవాళ్ళ జాడలు చెరిపేసుకోవాలనే వెతుకులాటలో   

చేయని నేర భారాలతో బరువెక్కిన అస్తిత్వపు శకలాలు.

 వేయిపడగల కాలనాగు తర తరాలుగా తరాలను

 విషం తుల్యం చేసేస్తూ  ఒక ప్రక్క-

లౌకిక  మార్కెట్టు లో తాకట్టు వస్తువులై

తూకం  కొలతలే కాదు మూల్యం కూడా లేని

అత్యవసర తాజా సరుకు లై ఒక ప్రక్కా-

ఫత్వా, తత్వా, మోలీ,దళారుల మతలబులోక పక్కా -

పెట్టుబడుల పేదరాసి  పెద్దన్నయ్య పెద్దరికపు ఉక్కు పాదం  అటు ప్రక్క-

ఎటు చూస్తే అటు దుఃఖం , ఎటు తిరిగితే అటు నేరం

జీవించడం అంటేనే  రోజూ చావడ మైన తరుణం  ,

బ్రతకనీయండంటూ బ్రతిమాలుతూ  బ్రతుకీడ్చడం అలవడ్డ నైరాశ్యం ,

స్వేఛ్చ,సమానత్వాన్నీ ప్రజాస్వామ్య  స్వాభిమానాన్ని ఉరితీయడమే,

హక్కులే  అయోమయమైన  వేళ , బ్రతుకు గీతాల్ని బలిమితో చేరిపెయడమే

 అస్తిత్వపు ఆకాంక్షను హత్య చేయడమే  ,

ఇంతకీ హంతకులు ఎవరు ?    ఎవరిదీ పాపం ?                                డాక్టర్ మాటూరి శ్రీనివాస్

                                                                                                           7-12-14