భారత్ మాతా జై కీ

భారత్ మాతా జై కీ

                                                                                             డాక్టర్ మాటూరి శ్రీనివాస్

ఏమిటో ఈ మధ్య ఎక్కడ చూస్తే అక్కడ దేశ భక్తీ

ఇసకేస్తే రాలనంతగా ఆవహించుకుని ఉక్కిరిబిక్కిరి చేసేస్తుంది

దేశానికీ దేశ భక్తికీ మధ్య ఈ ఆధిపత్య పోటీనీ

 అందలమెక్కిన అసహనాన్నీ  చూస్తుంటే 

చచ్చేంత అవమానంగానూ, చేవ చచ్చిన సిగ్గుగానూ ఉంది

పాము తన పిల్లలని తానే మింగినట్లు రాజ్యమే రాజ్యాన్ని మింగేయడం

అబద్దం ఉన్మాదమై కాదన్నవాడిని కాటేయడం ఇక్కడ వైరుధ్యం

సత్యం అసత్యానికి బందీ అయి నిర్భంధ గృహంలో మగ్గే రోజు కోసం

ఘడియలు లెక్కపెడుతోంది 

దేశ మానాన్ని మెలిపెడుతోంది

దేశద్రోహమేమోనని భయపడుతుంది  

నిన్నటివరకూ పక్కవాడి మతోన్మాదాన్ని ఎంతగా ఆడి పోసుకున్ననో

నేడు అంతకి రెట్టింపుగా వీడు చాపకింద నీరైయ్యాడు  

జాతీయతని వస్త్రంగానో అస్త్రంగానో వాడుకోవడం  తెలిసిన

తొండ ముదిరి ఊసరవల్లి నుండీ మొసలిగా మారి కన్నీళ్లు కారిస్తే

ఆకలికీ కటిక దరిద్రానికీ రోత పుట్టి నిరాహార దీక్షకు దిగాయి

 కంచె మేసిన చేను ఇక్కడే పండానని ఎలా చెపుతుంది   

ఎనభై యాళ్ల దర్జీ మీర్ సాయిబు

పొట్ట చేత్తో పట్టణానికి వచ్చిన మా తాత కి చిన్ననాటి దోస్త్

అతని నెరిసిన గెడ్డం, నెత్తిన తకియాతో , పాటూ నేనూ

ఉనికికి నోచుకోని విదేశీయులం  ఏది దారీ?

 రేపో మాపో దేశమే డిటెన్షన్ కేంప్ కు తరలే లోగా

ప్రజాస్వామ్యం సాక్షిగా రాజ్యాంగ గొంతునై  ప్రకటిస్తున్నాను    

భౌగోళికమైన హద్దులు భౌతికం

పటం మీది బొమ్మ కాదు నా భారత మాత

వ్యక్తిగతమైన మతం మానసికం 

ఉన్మాద ఉక్రోశ జపం కాదు నా

సోషలిజం నేర్పిన సౌభాగ్యం నా దేశం

  మనిషి మతాతీత లౌకికం

నీవేనని సార్లు అనమన్నా అంటాను , మేరా భారత్ మహాన్