వృత్తి ధర్మం

వృత్తి ధర్మం                   

                                                                     డాక్టర్ మాటూరి శ్రీనివాస్ ((18-6-19)

ఊహ తెలిసిన దగ్గర నుండీ కలలు  కనాల్సిన రంగుల  ప్రపంచాన్నే

 త్యాగం చేయడానికి సిద్దపడిన  కారుణ్యం

 దయాళు హృదయం  ఆ చిన్న ప్రాణం,

ఆకలా ,దాహామా, ఆటా , పాటా, ఏమి త్యాగం చేయలేదని చెప్పాలి ?

అహరహమూ ఏదో వెలితిని తోడుకోవాలని

జిజ్ఞాసను పెంచుకుని పంచుకోవాలని లైబ్రరీలో పుస్తకాలను ధ్యానిస్తూ

నీళ్ళు త్రాగి క్షుద్భాదను చంపుకున్న ఆశయాల అమాయకత్వం ఆ ప్రాణం

రోగికీ  రోగానికీ అడ్డుగోడ కట్టాలని

జీవానికీ మరణానికీ అంతరాన్ని పెంచాలని

అమ్మ నాన్నల ఆకాంక్షలను తీర్చాలని 

నిద్రతో వాలుతున్న కనురెప్పలను వెనక్కి  మెదడుకి వేలాడుదీసుకుని

పడ్డ తాపత్రయాని పర్యవసానం ఈ  కీచక పర్వం అని తెలుసుకోలేకపోవడం

నిజమే , నిరపరాధమే , దానికే ఈ శిక్ష

రాత్రికీ పగలుకూ మధ్య నిద్రలేమి ఆనకట్టగా కట్టి

 సంపాదించిన స్నాతకోత్సవ డిగ్రీని ఉరి తీసిన తలారుల వెంపరితనానికి 

త్యాగం విలువ ఒక ప్రాణం విలువని

ఆ ఒక్క ప్రాణం విలువ వేల ప్రాణాల కొలువు అని ఎలా చెప్పాలి.?

ఉద్రేకాలు ఉన్మాదాలు ప్రాణాలను నిలిపిన దాఖలాలు ప్రపంచంలో లేవు

ప్రతీ చిన్న, పెద్ద అనారోగ్యానికి కూడా తన ఆరోగ్యాన్ని సైతం పణంగా పెట్టినందుకు

ఈ దుశ్చర్యల పర్యవసానం సబబైన పరిష్కారమా?

వెలుగు నీడల్లాగే  , గాలీ వానల్లాగే ,

ఊపిరిపోయడం  ఊపిరి తీయడం ప్రక్రుతి ధర్మం

నడుమ జరిగే  ప్రక్రియను సరళీకృతం చేయడంమే

వైద్య వృత్తి కి సహజ సాధు శీలమైన ధ్యేయం

ఈ మాత్రం తెలుసుకోలేని యింగితరహితుల మధ్య ఏమి చేసినా నేరమే,

వ్యవస్థని లోని లొసుగుల్ని  ప్రశ్నించలేని

పాలకుల ముసుగుల్ని తొలగించలేని

మూకల చేసిన ఆటవిక  ప్రకటన ఈ హింస

ప్రాణాంతకమైనప్పుడు వైద్యుడి ప్రాణం సైతం నిస్సహాయతలో 

కొట్టి మిట్టాడడం తప్ప చేసేదేముంది ?

 న్యాయం తలుపులు మూసుకున్నప్పుడు అమానుషాన్ని 

దిగమింగడం తప్ప..

 నిరసనల జెండా తగిలించుకుని నిరంతరం ప్రాణభయంతో

జీవించడం తప్ప, ....

వ్యావృత్తిని నిరాదరణకు బలిపెట్టి ధార్మికతతో

నిర్వహించడం తప్ప .......